नंदुरबार, दि. 5 (जिमाका वृत्त) – जिल्ह्यातील वर्ष 2007 पूर्वी नोंदणी झालेल्या वाहधारक व अनुज्ञप्ती धारक यांनी आपल्या अभिलेख्यांचे संगणकीकरण करुन घ्यावे असे आवाहन उप प्रादेशिक परिवहन अधिकारी किरण बिडकर यांनी एका शासकीय प्रसिद्धी पत्रकान्वये केले आहे. वर्ष 2007 पूर्वी नोंदणी झालेली वाहने व ड्रायव्हींग लायसन्स यांच्या हस्तलिखीत अभिलेखाचे संगणकीकरण करण्याचे कामकाज उप प्रादेशिक परिवहन कार्यालय, नंदुरबार येथे करण्यात येत असून वाहनाचा व लायसन्सचा अभिलेख संगणकीय प्रणालीवर उपलब्ध झाल्यावर सर्व वाहन धारकांना व वाहन चालकांना ऑनलाईन व फेसलेस सुविधांचा लाभ घेता येईल. कार्यालयात प्रत्यक्ष उपस्थित न राहता ऑनलाईन शुल्क भरणा करुन ड्रायव्हींग लायसन्सचे नुतनीकरण, दुय्यम प्रत तसेच वाहनाचा कर भरणा, वाहन हस्तांतरण व अन्य सेवा वाहन धारकांना उपलब्ध होतील. जिल्ह्यातील सर्व वाहन धारकांनी आपल्या वाहनांचे मुळ नोंदणी प्रमाणपत्र, विमा, आधार कार्ड, चेसीस क्रमांकाची पेन्सील प्रिंट, मोबाईल क्रमांक इत्यादी कागदपत्रे कार्यालयीन अधिक्षक यांचेकडे जमा करुन आपल्या वाहन अभिलेखाचे संगणकीकरण करुन घ्यावे. तसेच 2007 पूर्वीच्या अनुज्ञप्ती धारकांनी आपले हस्तलीखीत स्वरुपातील ड्रायव्हींग लायसन्स, आधार कार्ड, मोबाईल इ. सह लायसन्स विभागात संपर्क करावा ही सेवा पूर्णतः निशुल्क आहे. तसेच सन 2007 नंतर वाहनाची नोंदणी झाली असेल अथवा स्मार्टकार्ड ड्रायव्हींग लायसन्स असेल तर अशा वाहनधारकांनी उप प्रादेशिक परिवहन कार्यालयास संपर्क साधण्याची आवश्यकता नाही असेही श्री. बिडकर यांनी शासकीय प्रसिद्धी पत्रकान्वये कळविले आहे.
